2011/03/31

北京出差第五天

終於過咗兩日冇嘢做嘅日子,今日係 kickoff 大會第一日,一早就返到公司,新嘅會議室好大間,仲有梳化位坐,好舒服。
今年kickoff 因為主題係 virtual, 所以都係播片為主,叫做 virtual kickoff... 有啲沉悶,11點幾就午餐,有飯盒,冇出去食。
食完嘢特別眼瞓,天氣又唔凍,好彩同事話唔駛坐定定睇片,可以行下食下嘢,於是就食下零食順便抖抖啦。
夜晚約咗舊同事,去中關村廣場食雲南嘢,佢地掛住傾計,我點菜,好在全部都好食。
十點左右就坐地鐵返酒店休息。

2011/03/30

北京出差第四天

今日唔駛咁早返公司,食完早餐返房坐下,十點先出發,返到公司睇下email上下網,就午餐,去咗俏江南,不過食嘅唔似江南菜,辣嘅為主。
下晝再返公司坐下做下嘢,五點左右就返酒店,原本約咗舊同事,後來臨時有事冇得去,同咗台灣同事們一齊去咗中關村廣場,食港/川菜,好懷念嘅港式奶茶同燒味都食到喇。

2011/03/29

北京出差第三天

今日原本唔駛返公司,不過老細話想我地team討論,我又早咗出去,九點就到,十一點先齊人,隨便做嘢同分享嘢就過咗大半日。晏晝喺中關村嘅酒樓食飯。四點幾五點,我地就走,返酒店再出去食飯,搵到一間雲南火鍋“香草香草”,幾特別,雖然辣但唔係好過份,又唔係好油,都OK健康啦,八點幾就返到酒店,今晚可以瞓晏啲。

2011/03/28

北京出差第二天

今朝要返公司training,食完酒店啲唔好食嘅早餐,就出發了。的士又唔識去,於是我就提議一齊坐地鐵過去,不過地圖上面公司好近地鐵站,原來行上嚟都幾遠,好在都九點前到。上晝training去到一點,公司有外賣食,都OK好食。
食飽之後又出發去另一邊office,坐同事車去都要半個鐘頭,兩點半training到四點,今晚team dinner, 所以冇得走住。七點半又去咗每次嚟北京都去嘅小王府食,好滿足,同事載我地返酒店,返到嚟成十點,有啲攰添。
聽日冇得去玩,老細想我地自己開會傾下嘢。

2011/03/27

北京出差第一天

五點十分就到北京機場,但係等行李等到五點九,去坐的士,的士司機又唔識路,好在我出發之前已經睇過大約喺邊個地鐵站附近,所以叫司機喺佢識去嘅街嘅地鐵站放低我,我自己坐地鐵過去,好在酒店好近地鐵站,一落車行五分鐘就到。結果成七點半先到酒店,執好啲嘢都八點,酒店附近又冇咩好食,行遠少少有KFC又郗吉野家,就喺吉野家食咗個牛肉飯算了。

2011/03/18

再去北京

又準備一年一度的公司年度 kickoff 了,今次都是北京,不過在中關村的辦公室,近頤和園。
27/3的下午起飛,晚上到,28/3下午有培訓,29和30沒有事做,31和1/4是kickoff會議,2/4另一個培訓,晚上回港。