昨晚睇過一個人的BLOG，講自己買NDS同打機的“歷史”，今日玩住NDS，又諗起自己打機的歷史。
83年左右出咗任天堂紅白機，85年左右，因為我“好乖”肯去醫院做口唇手術，送咗一部紅白機俾我，我知果時屋企好窮，呢部紅白機都算係一件貴嘢（仲連埋磁碟機！）
日日返屋企打一個鐘機，好好玩，我記得好似得一兩餅帶同幾隻碟，不過都好正。
後來舅父仲送多咗個 Doctor 俾我（玩 _ 版碟用，D人把卡帶的DATA放入幾隻碟度，玩時要逐隻入），我部係 Top model 的 6M+！
之後就經常去置樂的利寶商場 "dup" game了，開頭一個月去一次（要阿媽帶嘛），之後兩星期去一次，好密呢！
我地經常去一個由兩公婆開的店，去到我同阿妹就揀 game，老細開俾我地試玩，阿媽就同老板娘閑話家常，哈哈哈。
就咁樣玩咗幾年，紅白機開始俾超任同世嘉取代了，"dup" game 的店也都買少見少，於是就冇乜新game了。
之後舅父又送了一部世嘉五代俾我，感覺係：好勁呀！畫面靚好多，遊戲複雜好多，最常玩的就係同阿妹玩戰斧了，一二三集都打爆晒！我地好勁呢。
另外仲有爸爸最愛的超音鼠系列，同埋少見的中文game: 三國志列傳。
不過之後要考會考，高考，都好少玩了，直至小舅父送了 Playstation 和一堆 games 俾我之後，不過好似唔係好多好game, 又要返大學，之後都好少掂遊戲機了。
今年出了NDS Lite, 我借了同事的 NDS 來玩，覺得我應該再次“出山”打機了，於是就去左買啦！
玩了兩個月，我相信我真係冇買錯，任天堂，我愛你！
